N年無出過文...我又返來！
最最喜愛灣仔快樂餅店的雞批，酥酥脆胞又香口。雖然自己會焗，但耐不耐都會行過就幫襯。
因為社會要營運呀！雖然話自己做就算用靚料都可能會抵過出面餅店買，但店鋪有
燈油火爉同人工皮費，鋪租呢！？？！（老豆自細教落，都要比人賺吓～)
社會如果無買無賣，人人都只諗住比成本價，小店就更加難生存，試想想如果自己開價比自己的成品？？大家會點開？只計材料錢就賣比人？
差價就是給職人一個尊重～
唯一係希望業界都同樣尊重本業，做出好味足料的食品，值回票價！
(絕對試過中伏...食過無味又乾的撻(柴)皮....仲要名店）
好！話說回來，雞批雞批！
*以下內餡材料備份頗隨意，請在制作的時候自己看著份量加減及試自己喜歡的味道。
*我會加小小咖喱粉會惹味啲～
*把撻皮做形後焗半熟，直接下餡蓋上撻面亦可以～我今次是這麼做～
*焗爐爐溫有所不同，請自我目測調教
批皮材料：
麵粉 200g
糖 40g
牛油（溫室軟身） 125g
蛋 1個
鹽 小小
吉士粉* 2.5茶匙
泡打粉* 小小（0.25g）
蛋汁（掃批邊及掃面）
*吉士粉&泡打粉落咗會較似港式麵包老店嘅味道，請自行決定落與否。
選擇不落的話其他不變。（我今次就有落）
做法：
-粉類過篩。溫室軟身牛油跟糖用打蛋器打勻，加蛋混合，再加粉類搓壓成團。
-包好保鮮紙放入雪櫃冷藏最少一小時後拿出，分一個個小圓球在批殻上做批底型，用叉在批底剌小孔。
-再放入雪櫃把批底雪大約半小時，此時亦可以預熱焗爐十五分鐘。
-170度把皮焗約5分鐘焗至半熟就好，備用。
內餡
雞肉 100g （整片烚一下過熱水令蛋白質先凝固，再切)
洋蔥 1/4個
蒜茸 小小
火腿 1片
磨菇 4-5個
(好上切粒或絲)
*想加青豆或用西芹紅蘿蔔做成素菜批亦得！
白汁
牛油 30g
麵粉 30g
奶 210g
黑椒 小小
鹽 小小
白汁做法：
中火，牛油下小鍋煮溶，加入麵粉用蛋發(whisk)攪成糕狀後，分三次加奶攪勻，再加鹽黑椒等調味，備用。
平底鑊，下蒜茸、洋蔥炒出香味，落雞肉、磨菇炒至7成熟，盛起，混合火腿絲加入白汁，攤凍備用。
綜合做法：
-預熱焗爐200度
-餡料放入半熟批底，想漲卜卜；餡就落一個小山形，想完成後平嘅就吾好落太多料。（我鍾意漲卜卜～）
-把批皮幹平後，用一個比批大一點的圓型模cut出圓形。
-在批底邊掃上蛋汁，蓋上圓形批皮在半熟批把邊接合好。
-掃上一層蛋汁，再用利刀輕力劃上自己喜歡的紋理 。（如果刀沾上批皮，就要抹干淨再落下一刀，紋就會利落。有人用叉有人用牙簽，各施各法啦）
-200度焗十五分鐘至表面金黃。我習慣焗完等一陣就脫模落紙托。（撻模亦無掃油）慢用 ^^～
